O Concello de Xermade continúa cos actos de celebración do 8 de marzo, Día Internacional da Muller, cunha conferencia da man de Bego Bermúdez, especialista da función do suxeitador na saúde da muller.

A idea central da charla será remarcar a importancia de levar un suxeitador axeitado para coidar a saúde do peito e da muller, xa que o uso inadecuado desta prenda pode conlevar doenzas como dor de costas, hernias, dor de cabeza… remarcando que un suxeitador ben tallado é primeiro saúde e logo estética.

O Pleno da Corporación xermadina celebrou sesión ordinaria o xoves 9 de febreiro de 2023, ás 20.00 horas. Na parte resolutiva aprobouse inicialmente o Regulamento de títulos, honras e distincións, como paso previo á concesión do título de fillo predilecto a José Mouriño Cuba, nado na parroquia de Lousada, unha petición realizada polo Partido Popular vía rogo no pleno de outubro.
Tamén se aprobou un suplemento de crédito por importe de 15325,20 euros, financiado con remanente líquido de tesouraría, para a achega municipal ao programa de investimentos do Plan Único 2023. A Alcaldía explicou a solicitude de participación do concello nesta convocatoria, aprobada pola Xunta de Goberno Local o 8 de febreiro de 2023, desagregada por programas: 1190235_PCC_SOLICITUD TELEMÁTICA_2023
Na parte de fiscalización e control douse conta da liquidación do orzamento do exercicio 2022, que foi aprobada por Decreto da Alcaldía de data 6 de febreiro de 2023, que arroxa un resultado orzamentario de 208.440,62 euros e un remanente líquido de tesouraría para gastos xerais de 600.337,07 euros. No 2022 os gastos financiados co remanente do 2021 ascenderon a 470.878,00 euros, o que supuxo o incumprimento dos principios de estabilidade orzamentaria e a regra de gasto, sen consecuencias pola suspensión das regras fiscais, que se mantén para 2023.
Ao remate da sesión, o alcalde anunciou que acaban de recibir a proposta de concesión provisional dunha axuda de 403.000,00 euros do Instituto de Transición Xusta para rehabilitar a Casa Reitoral de Xermade, que se transformará nun Centro Internacional da Torneiría, segundo o proxecto redactado polas arquitectas da Universidade da Coruña Luz Paz Agras e Marta Maroño: A Reitoral – CIT
A carpintería exterior do inmoble foi substituida recentemente con cargo ao Fondo de Compensación Ambiental.
O alcalde lamentou que o outro proxecto presentado a esta convocatoria de axudas, a Casa da Veciñanza de Roupar, fora denegado provisionalmente, e anunciou que presentarán alegacións no prazo de dez días outorgado ao efecto.

O Servizo de Atención Temperá da agrupación de concellos Vilalba, Guitiriz e Xermade resultou beneficiaria dunha subvención por importe total de 322.440,00 euros para o período comprendido entre o 1 de novembro de 2022 e o 31 de outubro de 2024 e un total de 17.989,00 horas solicitadas.
O representante da agrupación para este período é o Concello de Xermade, quen se encargou de solicitar as axudas e licitar o servizo. A Xunta de Goberno Local adxudicou, na sesión extraordinaria celebrada o 18 de xaneiro de 2023, a COESCO SLU (única licitadora) o servizo de febreiro a outubro de 2023, con posibilidade de prorrogar un ano máis o contrato. A empresa comprometeuse a manter durante toda a vixencia do contrato un equipo multidisciplinar formado por tres profesionais (logopeda, terapeuta ocupacional e psicólogo/a) a xornada completa.
O servizo tivo que licitarse por segunda vez ao quedar deserta a licitación anterior, ao esixirse un equipo de 6 profesionais, sen que ningunha das licitadoras fora quen de acreditar dispoñer do mesmo.
Por ese motivo, o servizo estase prestando dende o 1 de novembro de 2022 mediante un contrato menor de servizos, que chegará ao seu fin unha vez que se formalice o contrato derivado da segunda licitación.

A Xunta de Goberno Local da Deputación de Lugo vén de aprobar un convenio de colaboración co Concello de Xermade para a reposición de beirarrúas e execución de senda peonil no núcleo de Xermade, por importe de 126.864,99 euros, dos cales 123.640,85 euros serán achegados pola institución provincial.
A finais de decembro a Alcaldía solicitou esta axuda, coa remisión dun proxecto técnico asinado polo enxeñeiro de camiños, canles e portos Miguel Ángel Fernández Rivera. O estado das beirarrúas da capital do municipio precisa unha renovación que pasa pola demolición das existentes (de baldosa hidráulica) e a execución dunhas novas, con lousa de formigón de 15 cm de cor, seguindo o modelo empregado no Campo da Feira-Momán.
Asemade, executarase unha senda peonil na entrada do núcleo, no tramo no que se atopa o lavadoiro público e dúas vivendas, a fin de mellorar a seguridade vial dos peóns.
Coa solicitude das axudas presentouse tamén solicitude de cesión das estradas de titularidade provincial no núcleo de Xermade en favor do concello.
O convenio asinouse o pasado 30 de decembro de 2022 e as obras deben executarse antes do 31 de outubro de 2023.